Каталонія мае намер звярнуцца ў Еўрапейскі суд, а таксама да ўлад Еўразвяза, калі Мадрыд забароніць праводзіць рэферэндум аб незалежнасці.
Пра гэта заявіў у панядзелак кіраўнік урада рэгіёна Артур Мас у інтэрв'ю тэлеканалу TV3, перадае РІА «Новости».
«Калі іспанскі ўрад праз канстытуцыйны суд забароніць нам праводзіць рэферэндум аб незалежнасці, то нам нічога не застаецца, як звярнуцца па дапамогу да Бруселя і Еўрапейскага суда», - заявіў Артур Мас.
У апошні час жыхары Каталоніі на фоне пагаршэння эканамічнага становішча ў краіне ўсё часцей патрабуюць выйсці са складу Іспаніі і стварыць незалежную дзяржаву.
Раней кіраўнік урада рэгіёна абвясціў, што 25 лістапада ў Каталоніі пройдуць датэрміновыя выбары, падчас якіх выбаршчыкі павінны будуць адказаць на пытанне аб неабходнасці выхаду рэгіёну са складу Іспаніі. Ён растлумачыў сваё рашэнне тым, што рэгіён-донар павінен мець права самастойна вызначаць узровень падатковых адлічэнняў у дзяржказну. Аднак Мадрыд не згодны з гэтым патрабаваннем.
Парламент Каталоніі падтрымаў Артура Маса і ўхваліў правядзенне рэферэндуму па пытанні аб самавызначэнні аўтаномнай вобласці. За гэтае рашэнне прагаласавалі 84 дэпутаты са 131, у асноўным, ад нацыяналістычных партый.
Разам з тым, парламент Іспаніі прагаласаваў супраць правядзення ў Каталоніі рэферэндуму аб незалежнасці.
Старшыня ўрада Іспаніі Марыяна Рахой расцаніў спробы ўлад Каталоніі выйсці са складу краіны як «вар'яцкія», і заявіў, што ніколі не дапусціць падзелу краіны.
Яшчэ адзін еўрапейскі рэгіён, які патрабуе правядзення рэферэндуму аб незалежнасці, - гэта Шатландыя. Учора прэм'ер-міністр Велікабрытаніі Дэвід Кэмеран і першы міністр Шатландыі Алекс Сэлманд падпісалі ў Эдынбургу пагадненне аб правядзенні рэферэндуму аб незалежнасці.